用香港文化學 Network Science · 前言
《愛·回家之開心速遞》全 2,867 集字幕砌成嘅角色網絡;顏色係演算法自己分出嚟嘅三大家族。
大家都知而家係AI嘅年代。有LLM、有各式各樣嘅模型，彷彿處理數據分析世界，乜都可以話一句「AI做到」。
但係我寫個呢個系列介紹另一條路：network science(網絡科學)。我自己算係做呢一行嘅。喺一個咩都講AI嘅時代，我覺得network science有一種特別嘅魅力。因為佢唔係一個黑盒、無training data，個模型唔係學返黎。相比下一個LLM之所以識答嘢，佢餵咗極大量data，將知識壓成幾十幾百億個參數，結果就係好難指得出佢究竟點解畀呢個答案。network science唔同，我地可以淨係將幾條定義清楚嘅數學，直接用喺數據上面，但都有豐富嘅insight，每一步都拆得開，check得到。[1]
而network science最正嘅地方，就係佢可以跨好多唔同情況下使用。凡係有「邊個連住邊個」嘅嘢，就砌得成一個網絡。典型例子有傳染病點擴散、社交媒體點傳播、大腦神經點連。我想試下再講一個偏門嘅例子，一套電視劇入面啲角色點樣互動，都可以睇到。
呢個系列嘅源頭係咁嘅。今年六月，我去咗一個關於network science同complexity science嘅會議，期間見到一隊嚟自馬來西亞嘅研究團隊，用佢哋嘅國民動畫Upin & Ipin砌咗一個角色網絡 [2]。佢哋發現一件好得意嘅野：單憑角色之間嘅對話關係，就可以重現到真實社會嘅連結模式：有啲角色係「橋樑」，一抽走佢哋成班人就散。入面另一個例子係，佢地比較動畫同電影：電視劇係家庭核心、電影係群戲冒險。而嗰個社交網絡又真係會變曬型，而數字可以反映個風格有唔同。
我睇完就諗香港呢？有咩劇集夠長、夠連貫，值得咁樣拆開嚟睇？我諗咗好耐，香港電視劇嘅連貫性好低。一集一個鐘，一輯二十集，如果有第二輯幾乎係完全唔同嘅故事。要係要連貫嘅，資源又夠多，我淨係諗到《愛·回家之開心速遞》。[3]
所以今次，我想用呢套接近十年嘅劇，一步一步帶大家睇，到底network science可以做啲乜、我哋又可以喺入面睇到啲乜。
[1] 當然啦，點砌連結，用咩演算法呢啲都係要人手判定，但係個選擇嘅結果會喺枱面見到，而唔係喺一堆權重入面。
[2] Preprint喺度
[3] 呢個「夠多」就變咗二千幾集......咁變相用人工labelling呢件事就變到極不可行。
netsci.ianip.me · 用香港文化學 network science